Бишкек, 04.08.25. /Кабар/. Бүгүн президенттин Нарын облусундагы өкүлүнүн аппаратынын кызматкерлери ыктыярдуу кан тапшыруу өнөктүгүнө катышуу үчүн медициналык текшерүүдөн өтүштү.
Өкүлчүлүктөн билдиришкендей, текшерүүнүн жыйынтыгында аппараттын 10 кызматкери кан тапшырууга жарактуу деп табылды. Алар жакынкы күндөрү ыктыярдуу донор катары кан берүү иштерине катышат.
Белгилей кетсек, бүгүн министрлер кабинетинин төрагасы Адылбек Касымалиев мамлекеттик кызматкерлерди кан тапшырууга жана ыктыярдуу донор болууга чакырып, бул багытта активдүү жарандык позицияны көрсөтүүгө үндөгөн.
Анын айтымында, кан тапшыруу – адамдын өмүрүн сактап калууга жардам берген асыл иш. «Ар бир тамчы кан – бул кимдир бирөө үчүн жашоо. Мамлекеттик кызматкерлер коом алдында үлгү болушу керек», – деди Адылбек Касымалиев.
Ал ошондой эле мамлекеттик мекемелерде кан тапшыруу өнөктүктөрүн уюштурууну жана кызматкерлерге бардык шарттарды түзүүнү тапшырды.
