Бишкек, 12.08.25. /Кабар/. Нарын шаарында райондук мамлекеттик администрация башчылары (акимдер) жана шаар мэрлерине улуттук коопсуздукту камсыздоо багытында квалификацияны жогорулатуу курстары өтүүдө. Бул тууралуу Коргоо министрлигинен билдиришти.
Анда белгиленгендей, күн мурун иш-чаранын ачылыш аземи болду.
Аны Куралдуу күчтөрдүн Башкы штабынын башчысы— коргоо министринин биринчи орун басары Кумарбек Калматаев ачып, курстун маанилүүлүгүн белгиледи.
“Бул курс жетекчилерге алардын компетенциясынын чегинде улуттук коопсуздукту камсыз кылуу маселелери боюнча негизги талаптарды жеткирүүгө, ошондой эле биргелешкен иш-чараларды жүзөгө ашырууга, мамлекеттик администрациялардын ордун аныктоого багытталган”, - деп айтты.
Министрликтин маалыматы боюнча, курстарга өлкөнүн бардык аймактарынан 60тан ашык райондук администрациялардын жана шаар мэрияларынын жетекчилери катышууда.
Алар үчүн аймактык коргонуу, мобилизациялык даярдык жана улуттук коопсуздукту камсыздоо багыттары боюнча теориялык жана практикалык сабактар өткөрүлөт.
