Бишкек, 11.06.26. /Кабар/. Нарын шаарында төрөт үйү курулууда. Бул тууралуу Курулуш, архитектура жана турак-жай коммуналдык чарба министрлигинен билдиришти.
Маалыматка ылайык, долбоор республикалык бюджеттин эсебинен каржыланууда. Объекттин курулушу 2025-жылдын декабрь айында башталган.
Башкы план боюнча, жалпы аянты 3129 чарчы метрди түзгөн үч кабаттуу имарат 100 орунга ылайыкталган.
Төрөт үйү керектүү медициналык жабдуулар менен камсыздалып, ашкана, дарыгердин кабинети жана стерилдөө бөлмөлөрү жайгаштырылат.
Курулуш-монтаждоо иштерин башкы подрядчы “Кыргызкурулуш” мамлекеттик ишканасы жүргүзүүдө.
