Бишкек, 30.11.25. /Кабар/. Нарын облусунда жалпы 161 шайлоо участогу ачылып, добуш берүү активдүү жүрүүдө. Бул тууралуу президенттин аймактагы өкүлчүлүгүнөн билдиришти.
Маалыматка ылайык, облуста жалпы 2 шайлоо округу түзүлгөн. №30 шайлоо округу жана №29 шайлоо округу. Мындан сырткары, аралыктан добуш берүү үчүн 1 шайлоо участогу ачылган.
Бардык шайлоо участкалары тиешелүү жабдыктар менен жабдылган.
Нарын облусунда үч күндөн бери коомдук коопсуздук күчөтүлгөн тартипте камсыздалууда. Ар бир шайлоо участогунда укук коргоо органдарынын кызматкерлери бар. Арыз-даттануулар түшө элек.
№30 шайлоо округунда жалпы 136 миң 461 шайлоочу, ал эми № 29 шайлоо округунда 137 миң 748 шайлоочу бар.
