Ташкент, 28.05.25. /Кабар/. Өзбекстандын Наманган шаарында Жалал-Абад облусунун ишкерлер делегациясынын катышуусунда бизнес-форум болуп өттү. Бул тууралуу Кыргызстандын Өзбекстандагы элчилигинин басма сөз кызматы маалымдайт.
Форумга Кыргызстандын президентинин Жалал-Абад облусундагы ыйгарым укуктуу өкүлү Тилек Текебаев жана Соода-өнөр жай палатасынын Жалал-Абад облустук бөлүмүнүн жетекчиси Мааданбек Караев жетекчилик кылышты.
Иш-чаранын алкагында В2В форматындагы эки тараптуу жолугушуулар өтүп, Жалал-Абад облусунан келген 32 компания өз товарларын жана кызматтарын тааныштырды. Форумдун жыйынтыгында эл керектөөчү товарларды жеткирүү боюнча бир катар келишимдерге жана контракттарга кол коюлду. Ошондой эле катышуучулар Наманган облусундагы текстиль өндүрүшүнүн ишмердүүлүгү менен таанышты.
Форум бир катар маанилүү биргелешкен долбоорлорго жол ачты. Алардын катарында төмөнкүдөй демилгелер бар:
Ала-Бука районунда “Байтала” соода-логистикалык борборун куруу;
Кубаттуулугу 1000 МВтка чейин жеткен ГЭСтер каскадын куруу;
Соода жана өндүрүш тармагындагы кызматташтыкты тереңдетүү.
Эскерте кетсек, Жалал-Абад облусунан Өзбекстанга негизинен ири мүйүздүү мал, майда мүйүздүү мал, жылкылар, минералдык суу, кыргыз жаңгагы, таш көмүр, травертин жана электр энергиясы экспорттолот.
