Бишкек, 24.01.25. /Кабар/. Бишкек шаарынын мэриясынын Муниципалдык инспекциясы 2024-жылы экологиялык эрежелерди бузган тараптардан дээрлик 3 млн сом чогултту.
Муниципалитеттен билдиришкендей, 2024-жылдын ичинде Муниципалдык инспекция 256 таштанды, башка калдыктар жана куураган чөптөрдү өрттөө учурларын каттаган. Жалпы айыптардын суммасы 3 млн сомго жакын болду.
Ошондой эле бүгүн, 24-январда Бишкек шаарында көрктөндүрүү эрежелеринде тыюу салынган таштандыларды өрттөгөндөрдү аныктоонун алкагында, ккурулуш материалын өрттөгөнү үчүн А.Н.Ш. аттуу жаранга айып салынды. Текшерүү учурунда шаар тургуну ламинаттын кесиндилерин от жагуу үчүн колдонгондугу белгилүү болгон. Толук күйүп бүтпөгөн таштанды сыртка чыгарылып, ал айланада курч жыттын таралышына себеп болгону белгиленди.
Ошондой эле экологиялык мыйзам бузуу Витебский көчөсү, 1а дарегинде катталып, жергиликтүү жашоочу Т.Р.А. аттуу жаран таштандыларды өрттөгөндүгү үчүн КРнын Укук бузуулар кодексинин 115-беренесинин 3-бөлүгүнө ылайык протокол түзүлдү.
Белгилей кетсек, көмүр жана отун колдонууга уруксат берилген, ал эми башка нерселерди өрттөөгө тыюу салынат. Мыйзам бузуу үчүн жеке адамдарга 7 500 сом, юридикалык жактарга 23 000 сом өлчөмүндө айып каралган.
