Бишкек, 18.11.25 /Кабар/. Россия өкмөтүнүн төрагасы Михаил Мишустин Москвада Шанхай кызматташтык уюмуна (ШКУ) мүчө мамлекеттердин Өкмөт башчыларынын кеңешинин жыйынын өткөрүүдө, деп билдирет РИА Новости.
"Биз ШКУнун алкагында соода-экономикалык жана гуманитардык кызматташтыкты кеңейтүүгө багытталган кеңештеги Россиянын төрагалыгын аяктап жатабыз. Бардык мамлекеттерге конструктивдүү, өнөктөштүк өз ара аракеттенүүсү үчүн ыраазычылык билдирем. Бүгүн биздин күн тартибибизде бир катар маселелер каралат", - деди Мишустин тар курамдагы жыйында.
Азыркы жыйын Россиянын 2024-2025-жылдардагы ШКУнун Өкмөт башчыларынын кеңешинин акыркы иш-чарасы болот. Күн тартибинде ШКУнун алкагында ар кандай тармактарда кызматташууну чыңдоо боюнча артыкчылыктуу маселелер талкууланат.
Россиянын министрлер кабинетинин маалыматы боюнча, өкмөт башчылары ШКУнун 2035-жылга чейинки Өнүктүрүү стратегиясын ишке ашыруу жана эң башкысы, соода-экономикалык, маданий-гуманитардык байланыштарды кеңейтүү боюнча чараларды карашат.
Алар санариптик экономика, энергетика, жашыл өнөр жай, жасалма интеллект, илим жана инновация, билим берүү, маданият, туризм, саламаттык сактоо, спорт жана жаштар алмашуу жаатындагы кызматташууга басым жасашары белгиленди.
ШКУга он мамлекет мүчө: Кыргызстан, Беларусь, Индия, Иран, Казакстан, Кытай, Пакистан, Россия, Тажикстан жана Өзбекстан.
