Бишкек, 16.10.25. /Кабар/. 11-октябрда Москва шаарындагы Мамлекеттик академиялык Кичи театрдын сахнасында КР эл жазуучусу Чыңгыз Айтматовдун чыгармасы боюнча коюлган "Ак кеме" спектакли көрсөтүлдү.
Кыргызстандын Россиядагы элчилигинен билдиришкендей, спектакль "Ири гастролдор" программасынын алкагында Ысык-Көл облустук К.Жантөшев атындагы музыкалуу драма театры тарабынан коюлган.
Элчи Кубанычбек Бөкөнтаев өз сөзүндө Кыргызстан менен Россиянын маданий кызматташуусу өнүгүп жатканын, кыргыз театрларынын алдыңкы өкүлдөрүнүн Кичи театр сыяктуу тарыхый сахнада чыгармачылык алмашуусу эки элдин маданий байланышынын жандуу далили экенин белгиледи.
Элчи театр жамаатын ийгиликтүү спектакль менен куттуктап, Ч.Айтматовдун чыгармасынын оригиналдуу чечмеленишин, актёрлордун жогорку чеберчилигин жана көрүүчүлөрдүн жылуу кабыл алуусун белгиледи.
Иш-чарага белгилүү орус маданият жана искусство ишмерлери — А.А. Золотов, В.С. Спесивцев, Г.А. Заславский жана Москвада жашаган мекендештер катышты.
2025-жылдын 12-октябры күнү ушул эле сахнада Ысык-Көл театры "Күн кармаган бала" аттуу драманы көрсөттү. Бул спектакль 2023–2024-жылдары өткөн эл аралык театр фестивалдарында үч ирет Гран-при сыйлыгын жеңип алган.
