Бишкек, 02.03.26. /Кабар/. Чүй облусунун Москва районунда азык-түлүк жарманкеси өттү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, Беловодское айылында өткөрүлгөн иш-чарада тургундарга жеткиликтүү жана туруктуу баада эт, сүт азыктары, жашылча-жемиштер жана негизги тамак-аш азыктары сунушталды. Жарманкеге жергиликтүү дыйкан, фермердик чарба жана кайра иштетүүчү ишканалар катышып, ортомчусуз соода жүргүзүүгө мүмкүнчүлүк жаралды.
Жарманке калкты сапаттуу жана жеткиликтүү азык-түлүк менен камсыз кылуу, баалардын негизсиз өсүшүн алдын алуу, ошондой эле өндүрүүчүлөр менен керектөөчүлөрдүн ортосунда түз байланышты түзүү максатында уюштурулду.
Министрликтен белгилешкендей, өлкө боюнча азык-түлүк кору жетиштүү деңгээлде камсыздалган жана ички рынокто негизги тамак-аш азыктарынын баа туруктуулугун камсыздоо боюнча тиешелүү мамлекеттик органдар тарабынан туруктуу мониторинг жүргүзүлүүдө.
