Бишкек, 13.11.25. /Кабар/. Бүгүн Ош облусунда Жогорку Кеңешке депутаттарды мөөнөтүнөн мурда шайлоо учурунда коопсуздукту жана коомдук тартипти камсыздоо маселелерине арналган жыйын өттү.
Президенттин аймактагы өкүлчүлүгүнөн билдиришкендей, жыйынга облус башчысынын биринчи орун басары Илияз Ташбаев төрагалык кылып, ага Улуттук коопсуздук мамлекеттик комитетинин Ош облусу жана Ош шаары боюнча башкы башкармалыгынын, ички иштер органдарынын, Өзгөчө кырдаалдар министрлигинин, Чек ара кызматынын жана башка тиешелүү мамлекеттик органдардын өкүлдөрү катышты.
Жыйында шайлоо учурунда жана ага даярдык көрүү мезгилинде коомдук жана мамлекеттик коопсуздукту камсыз кылуу, террордук жана экстремисттик коркунучтардын алдын алуу боюнча маселелер талкууланды.
Талкуунун жыйынтыгында укук коргоо жана мамлекеттик органдарга бир катар конкреттүү тапшырмалар берилди. Атап айтканда, шайлоо тилкелеринин жана стратегиялык объектилердин коопсуздугун камсыздоо, коомдук тартипти сактоо, патрулдук жана күзөт кызматтарын күчөтүү, өрт жана чек ара коопсуздугун камсыздоо чараларын көрүү милдеттендирилди.
Белгилей кетсек, Кыргызстанда парламенттик шайлоо 30-ноябрда өтөт.
