Бишкек, 16.10.25 /Кабар/. Жалал-Абад облустук филармониясынын “Мөлмөл” эл аспаптар оркестри Индияда өткөн IX эл аралык “Рамаяна” фольклордук музыка фестивалына катышып, байгеге ээ болду.
Маданият министрлигинен билдиришкендей, оркестрдин 12 адамдан турган чыгармачыл курамы фестивалга Кыргызстандын атынан катышып, жогорку деңгээлде өнөрлөрүн көрсөттү. Иш-чара Индия өкмөтүнүн демилгеси менен уюштурулуп, өлкөнүн бир катар ири шаарларында — Дели, Чандигарх жана Дехра-Дунда өткөрүлдү.
Фестивалга жалпысынан 13 мамлекеттен, анын ичинде Израиль, Армения, Лаос, Индонезия, Мальдив Республикасы жана башка өлкөлөрдөн келген элдик фольклордук ансамблдер катышты.
Кыргызстандык өнөрпоздор бул эл аралык маданий иш-чарада улуттук обондор менен катар “Танцор Диско” фильминен белгилүү “Goro Ki Na Kalo Ki” чыгармасын аткарып, элдин жана уюштуруучулардын өзгөчө кызыгуусуна жана алкоосуна арзыды.
Белгилей кетсек, фестиваль сынак мүнөзүн эмес, ар улуттун музыкалык мурастарын даңазалоого багытталган иш-чара болуп эсептелет. Ага катышкан бардык топторго атайын сертификаттар тапшырылып, “Мөлмөл” эл аспаптар оркестри фестивалдын лауреаты деген ардактуу наамга ээ болду.
