Бишкек, 03.09.25. /Кабар/. Эксперттердин баамында, 2050-жылга карата планетанын калкынын дээрлик жарымы - 4-5 миллиардга жакын адам көздүн алысты көрө албаган оорусу (миопия) менен жапа чегип, көз айнек же башка көрүүнү оңдоочу аппараттарга муктаж болот. Бул тууралуу "Биринчи радионун" түз эфиринде офтальмолог-дарыгер Азиз Юлдашев билдирди.
Эмне үчүн алысты көрө албаган адамдардын саны өсүп жатат?
"Миопиянын пандемиясы" деп аталган оорунун негизги себеби - гаджеттерди: смартфондорду, компьютерлерди, планшеттерди узак мөөнөткө колдонуу. Экранда тынымсыз иштөө аккомодация спазмын, кургак көз синдромун жана башка көрүү көйгөйлөрүн жаратат. Бул санариптик аппараттар күнүмдүк жашоонун бир бөлүгү болуп калган заманбап дүйнөдө өзгөчө актуалдуу болууда.
Көздү кантип коргоо керек?
Чоңдор үчүн адистер "20-20-20" эрежесин сунушташат: экранда иштеген ар бир 20 мүнөт сайын 20 секунддук тыныгуу жасап, жок дегенде 6 метр (20 фут) алыстыктагы объектти карап туруңуз. Бул көздүн булчуңдарына күч келтирүүнү азайтат.
5 жашка чейинки балдар үчүн гаджеттер менен байланышты чектөө же толугу менен жок кылуу керек. Аппараттарды эрте жана узак мөөнөткө колдонуу көрүүнүн начарлашы жана келечекте көз айнек талап кыла турган миопиянын өрчүү коркунучун жогорулатат.
Балдардын көрүү көйгөйлөрүнүн белгилери
Ата-энелер төмөнкү сигналдарга көңүл бурушу керек: көздөрүн тез-тез жүлжүйтүп кароо, так-даана көрүнбөгөн сүрөткө даттануу, өзгөчө арткы парталардан доскага караганда, көздүн чарчоосуна байланыштуу дайыма баштын оорушу. Бул белгилерди байкасаңыз, мүмкүн болушунча тезирээк офтальмологго кайрылганыңыз оң.
Миопияны токтотууга болобу?
Миопияны толугу менен айыктыруу мүмкүн эмес, бирок анын өнүгүшүн басаңдатууга болот. Бул үчүн атайын көз айнектерди же линзаларды, анын ичинде ортокератологиялык көз айнектерди колдонуңуз, көз көнүгүүлөрүн жасаңыз, көрүү жүктөмүнүн режимин сактаңыз жана сыртта көбүрөөк убакыт өткөрүңүз - табигый жарык көзгө пайдалуу.
Көрүү абалына мониторинг жүргүзүү үчүн дарыгерлер алты ай сайын профилактикалык текшерүүдөн өтүүнү сунушташат, айрыкча, көрүүсү тезирээк өзгөргөн балдар жана өспүрүмдөр үчүн бул шарт.
Тамактануу жана кошумчалар
Офтальмолог эскерткендей, көбүнчө көрүүнү жакшыртат делген биокошулмалары бар каражаттар натыйжасыз. Анын ордуна рационго майлуу балыктарды кошуу маанилүү.
Көрүүнү сактоо үчүн негизги нерсе - гаджеттерди туура колдонуу, көрүү гигиенасынын эрежелерин сактоо, көздү үзгүлтүксүз текшерүү жана туура тамактануу. Балдарга өзгөчө көңүл буруу зарыл, эрте алдын алуу миопиянын пайда болуу коркунучун азайтат.
