Бишкек 27.06.25 /Кабар/. Министрлер кабинетинин төрагасы Адылбек Касымалиев жана өзгөчө кырдаалдар министри Бообек Ажикеев тик учак менен Такыр-Төр көлүнүн үстүнөн визуалдык кароо жүргүзүүдө. Бул тууралуу Өзгөчө кырдаалдар министрлигинен билдиришти.
Белгилей кетсек, Ысык-Ата районундагы Такыр-Төр көлү жырылгандыгы тууралуу маалымат түшкөн.
Учурда Бообек Ажикеевдин тапшырмасы жана жеке көзөмөлү алдында Алмалуу, Тоолуу Серафимовка жана Төмөнкү Серафимовка айылдарындагы 180дей адам жана мүмкүнчүлүгү чектелген адамдар үйүнүн тургундары толугу менен коопсуз жайга эвакуацияланды.
”Такыр-Төр көлүнүн абалын тактоо жана көлдөн келип жаткан суунун агымын көрүү боюнча иштер үзгүлтүксүз уланып келген. Ошондой эле жеринде көзөмөл пункту уюштурулуп, жумушчу топ күчөтүлгөн режимде күнү-түнү көзөмөлдөп турушкан. Мындан тышкары атайын техникалар тартылып, даярдыктар уюштурулган“, - деп айтылат ӨКМдин маалыматында.
