Бишкек, 02.10.25. /Кабар/. Энергетика министри Таалайбек Ибраев күн мурун Сокулук РЭТине күтүүсүз барып, алдыдагы 2025-2026-жылдардагы күз-кыш мезгилине карата даярдыгын текшерди.
Ведомстводон маалымдашкандай, текшерүүнүн жүрүшүндө министр Сокулук РЭТиндеги оңдоп-түзөө, реконструкциялоо жана учурда район боюнча "акылдуу" эсептегичти орнотуу иштери менен жакындан таанышты.
Министр акылдуу эсептегичтерди орнотуу иштери белгиленген мөөнөттө тиешелүү көлөмдө аткарылбай жаткандыгын баса белгилеп, ушул жаатта ыкчам иш алып барууну Электр энергиясын сатуу кызматынын жетекчисине тапшырды.
Аны менен катар Сокулук РЭТинин жетекчисине бир ай аралыгында кызматкерлерди ишке өз убагында келип, кетүүсүн көзөмөлдөгөн турникет орнотууну, диспетчерчик кызматтын мнемосхемасын заманбап LED экранга алмаштырууну, электр энергиясын үнөмдүү пайдалануу боюнча керектөөчүлөр менен тыгыз иш алып барууну жана оңдоп-түзөө иштерин өз убагында жана сапаттуу аткарууну, коопсуздук эрежелерин так сактоону, маселе менен кайрылган абоненттерге сылык мамиле жасоону тапшырды.
Мындан тышкары Сокулук РЭТинин эмгек жамааты менен жолугушуп, чечилбеген маселелер, аткарылып жаткан иштер тууралуу кеңири маалымат алды. Анда энергетиктер атайын техниканын жетишсиздигин, айлык маянанын аздыгын билдиришти.
Министр айтылган сунуштарды угуп, кийинки жылы Чүй электр тармактар ишканасына көбүрөөк атайын техника бөлүнөрүн айтты. Аны менен катар кесипкөй адистерди тармакта кармап калуу үчүн жакынкы аралыкта айлык маяна көтөрүлөрүн билдирди.
