Бишкек, 24.07.26. /Кабар/. Бишкек шаарынын мэри Айбек Жунушалиев көчмө жыйын өткөрүп, шаардагы сейил бактарды көрктөндүрүү жана жаңы социалдык объекттердин курулушунун жүрүшү менен таанышты.
Муниципалитеттен билдиришкендей, шаар башчысы Ала-Арча дарыясынын жээгин комплекстүү көрктөндүрүүнү тез арада баштоону курулуш компанияларына тапшырды.
Ошондой эле Дайыр Асанов атындагы сейил бактагы реконструкция, Кыргызстан менен Азербайжандын Достук сейил багы жана "Байтик" паркындагы абал каралды. Аныкталган мыйзам бузууларды жоюу үчүн ижарачыларга бир жумалык мөөнөт берилди.
Көчмө жыйындын жүрүшүндө Байтик баатыр көчөсүндөгү 1224 орундуу Россия мектебинин жана Аалы Токомбаев көчөсүндөгү 900 орундуу жаңы мектептин курулушу да текшерилди.
Мэр жаңы билим берүү мекемелеринин интерьерин долбоорлоодо балдар үчүн ыңгайлуу чөйрө түзүү максатында психологдорду тартууну тапшырды.
