Бишкек, 13.01.26. /Кабар/. Мэриянын аппараттык жыйынында Балыкчы шаарынын мэри Баатырбек Жантаев шаардык кызматтардын жетекчилерине кескин талаптарды койду.
Муниципалитеттен билдиришкендей, калаа башчысы бардык мамлекеттик кызматкерлерди таза иштөөгө чакырды. Шаарда коррупциялык схемаларга жана мыйзамсыз иштерге таптакыр жол берилбестигин эскертти.
Мэр бүгүндөн баштап бардык иштер анын жеке көзөмөлүндө болорун билдирди.
"Мен уктабайм эми, түнү дагы барып текшерем. Бүт иштерди план боюнча өзүм көзөмөлдөп, өзүм чуркап бүтүрөм", - деп баса белгиледи Баатырбек Жантаев.
Белгилей кетсек, Баатырбек Жантаев Балыкчы шаарынын мэри болуп 2025-жылдын июль айында дайындалган.
