Бишкек, 01.09.25./Кабар/. Жаңы окуу жылынын башталышына карата майрамдык иш-чараларды өткөрүүдө укук тартибин жана коопсуздукту камсыздоо максатында милиция кызматкерлери тарабынан ыкчам-профилактикалык иш-чаралары өткөрүлүүдө. Бул тууралуу ИИМден билдиришти.
Республиканын билим берүү жайларында ИИМдин 5 миңден ашык кызматкерлери коомдук тартипти жана жарандардын коопсуздугун камсыз кылышууда.
Мындан тышкары, сейил бактардын аймактарында, соода борборлорунда, оюн-зоок комплекстеринде жөө жана көчмө кайгуулдар тартылат. Ошондой эле билим берүү мекемелеринин жанында жол коопсуздугун камсыздоого олуттуу көңүл бурулууда.
Ички иштер министрлиги айдоочуларды мектептердин жанынан унаа айдаганда өтө этият болууну эскертет. Ата-энелер балдарды унаага отургузуу жана түшүрүү учурунда коопсуздукту камсыз кылуу маанилүү.
ИИМ балдардын коопсуздугуна коркунуч жаралган учурда тез арада жакынкы милиция кызматкерине кайрылып же күнү-түнү иштеген 102 номуруна чалууну эскертет.
