Бишкек, 18.12.25 /Кабар/. Түркиянын Анкара шаарында түрк тилдүү мамлекеттердин жалган маалыматка каршы күрөшүү форуму расмий ачылды. Бул тууралуу Маданият министрлигинен билдиршти.
Иш-чарага Кыргызстан, Азербайжан, Казакстан, Түркия жана Өзбекстандан, ошондой эле байкоочу макамындагы Венгрия, Түркмөнстан жана Түндүк Кипр Түрк Республикасынан делегациялар катышууда.
Форумга Түрк мамлекеттер уюмуна мүчө мамлекеттердин маалымат тармагына жооптуу министрлери, мамлекеттик органдардын өкүлдөрү, медиа жана журналисттик коомчулуктун өкүлдөрү катышууда.
Иш-чаранын расмий ачылышында Түрк мамлекеттер уюмунун башкы катчысынын орун басары Өмер Кожаман жана Түркия президентинин администрациясынын Коммуникациялар башкармалыгынын жетекчиси профессор Бурханеттин Дуран куттуктоо сөзүн сүйлөштү.
Кыргызстандын маданият, маалымат жана жаштар саясаты министринин орун басары Марат Тагаев форумда сөз сүйлөп, санариптик мейкиндиктеги чакырыктар, медиасабаттуулукту жогорулатуу жана жалган маалыматтарга каршы кызматташуунун маанисине токтолду.
«Учурда санариптик технологиялар тез өнүгүп, маалымат өтө ыкчам тараган шартта медиасабаттуулук, маалыматтык коопсуздук жана жалган маалыматтарга каршы аракеттер өзгөчө актуалдуу. Бул чакырыктар улуттук чек аралардын чегинен чыгып, макулдашылган жана системдүү чечимдерди талап кылат. Форумдун жыйынтыктары түрк тилдүү мамлекеттердин ортосундагы ишенимди бекемдөөгө, биргелешкен медиапрактикаларды өнүктүрүүгө жана коопсуз маалыматтык мейкиндикти түзүүгө салым кошот», - деп белгиледи ал.
Тагаев ошондой эле түрк дүйнөсүнүн кызыкчылыгы үчүн жоопкерчиликтүү маалыматтык чөйрөнү түзүүгө багытталган долбоорлорго активдүү катышууга даяр экенин билдирди.
Форумдун негизги максаты – түрк тилдүү мамлекеттердин маалымат жана санариптик коммуникациялар чөйрөсүндөгү кызматташуусун чыңдоо, ошондой эле маалыматтын ыкчам жайылуусу шартында жалган маалыматтарга каршы биргелешкен ыкмаларды иштеп чыгуу.
Белгилей кетсек, иш-чара Түрк мамлекеттер уюмунун 2025-жылга чейинки маалымат чөйрөсүндөгү иш-аракеттер планынын алкагында өтүүдө.
