Бишкек, 03.07.25. /Кабар/. Бишкек шаарында Медеров көчөсүнүн 7-Апрель көчөсүнөн Панфилов көчөсүнө чейинки бөлүгү капиталдык оңдоодон кийин унаа кыймылы үчүн толугу менен ачылды.
Муниципалитеттен билдиришкендей, жол оңдоо иштеринин алкагында, жол тилкесинин эски катмары сыйрылып, 2 катмар асфальт басылды. Андан сырткары, жолдун эки четиндеги бордюрлар алмаштырылды. Ирригация тутуму иретке келтирилди.
Ошондой эле бардык жол белгилери чийилип, керектүү белгилер орнотулду. Жол айрым жерлерде 5 тилкеге чейин кеңейтилип, кесилиштерде бурулуштар үчүн кошумча тилкелер каралган.
Алдыда жарыктандыруу тутумун жаңылоо, аялдама комплекстерин куруу сындуу кошумча жумуштар жасалат.
Бул жаңылануу унаа кыймылын иретке салып, тыгындардын алдын алууга багытталган.
