Бишкек 05.06.25 /Кабар/. Кыргызстандын мамлекеттик катчысы Марат Иманкулов «Улуттук дем – дүйнөлүк бийиктик» доктринасына арналган биринчи форумга катышты.
Марат Иманкулов өз сөзүндө Кыргызстандын бай тарыхын, мамлекеттүүлүккө салым кошкон көрүнүктүү инсандардын эмгегин атап өтүп, мамлекеттин өнүгүүсүн, акыркы жылдардагы экономикалык өсүштү жана мекендин бүтүндүгүн, тынчтыгын сактоо үчүн армиянын коргоо жөндөмдүүлүгү чыңдалып жатканын белгиледи.
Ал ошондой эле таалим-тарбия жана билим берүү чөйрөлөрү көңүл чордонунда экендигин жана президент Садыр Жапаровдун ырааттуу саясаты аркылуу Кыргызстан эли биримдикте, ынтымакта өнүгүүгө карай багыт алып жатканын баса көрсөттү.
Жазуучуларга кайрылып, агартуучулук ишмердүүлүгүнүн маанилүүлүгүн белгиледи, элибиздин мекенге болгон сүйүүсүн жана улуттук түпкүлүгүн таанып-билүүсүн күчөтүү максатында “Менин Кыргызстаным” аттуу китеп жазууну сунуштады.
Форумда салттуулук менен модернизациянын айкалышына, ошондой эле президенттик «Улуттук дем – дүйнөлүк бийиктик» уңгу жол доктринасынын маанилүүлүгүнө өзгөчө көңүл бурулду.
Катышуучулар өлкөнүн туруктуу өнүгүүсү руханий негиздер, коомдун биримдиги жана жарандардын жоопкерчилиги сакталган шартта гана мүмкүн экенин баса белгилешти.
