Бишкек, 21.08.26. /Кабар/. Кыргызстанда алдыдагы жогорку деңгээлдеги иш-чараларды үзгүлтүксүз электр энергиясы менен камсыздоо үчүн ири объекттерде жана электр тармактарында даярдык иштери жүргүзүлүп, кошумча генераторлор орнотулду. Бул тууралуу “Кыргыз улуттук электр тармагы” ААКнын Өндүрүштүк-техникалык бөлүмүнүн жетекчиси Кубанычбек Исмаилов "Кабар" агенттигинин “Элден собол” берүүсүнүн түз эфиринде билдирди.
Анын айтымында, даярдык иштери “Манас” эл аралык аэропортунан тартып Ысык-Көл облусундагы Кырчын жайлоосуна чейинки аймактарда жүргүзүлдү.
“Мисалы, Чүй облусунда, Бишкек шаарында “Манас”, “Кыргызстан” көмөк чордондорунда, Ысык-Көлдө “Долинка” көмөк чордонунда иштер жүрүп жатат. Маданий иш-чаралар өтүүчү этношаарда эски чубалгыларды алмаштыруу, жаңы трансформаторлорду орнотуу иштери жүргүзүлдү”, - деди ал.
Исмаиловдун маалыматына караганда, ири объекттердин ар биринде генераторлор орнотулган. Ошондой эле иш-чаралар өтүүчү объекттерди электр энергиясы менен камсыз кылган көмөк чордондор жана электр чубалгылары текшерүүдөн өткөрүлдү.
“Электр энергиясын түндүк тарапка жеткирген чубалгыларыбыздын бардыгы Токтогул ГЭСинен баштап текшерилди. Иш-чаралар өтүүчү “Бишкек Арена” стадиону сыяктуу ири объекттерге электр энергиясын берген көмөк чордондор бар. Стадиондун жанында атайын электр кубатын берүүчү “Мурас” көмөк чордону салынган”, - деди ал.
Учурда компаниянын комиссиясы даярдык көрүлгөн объекттерди жеринде текшерип жүргөнү кошумчаланды.
