Бишкек, 18.03.26. /Кабар/. Манас шаарындагы ири объектилер Курулуш, архитектура жана турак жай-коммуналдык чарба министрлигинин көзөмөлүнө өткөрүлөт. Бул тууралуу министр Нурдан Орунтаев подрядчы компаниялардын жетекчилери жана жергиликтүү бийлик өкүлдөрү менен болгон жолугушууда айтканын президенттин аймактагы өкүлчүлүгүнөн билдиришти.
Маалыматка ылайык, анын ичинде 5 200 орундуу спорт сарайы, облустук оорукананын 7 кабаттуу кошумча имараты, "Акылман" президенттик лицейи, Түштүк аймактык жүрөк-кан тамыр хирургиясынын илимий борбору, шаардык музейдин имараты жана Көк-Арт дарыясынын жээгинде курулуучу насостук станция бар.
Мындан тышкары, Манас шаарында 6 млрд 800 млн сомго курулуп жаткан облустук филармониянын курулушу убактылуу токтотулат. Анын долбоору кайрадан каралып чыгып, кийинки этапта объекттин көлөмүн кыскартуу мүмкүнчүлүгү каралары айтылды.
Ошондой эле министрлик Сузак районунун Багыш айылындагы эс алуу багынын жана Чаткал районундагы оорукананын курулушун көзөмөлгө алат.
Орунтаев бул чаралар президенттин тапшырмасына ылайык, курулуш иштеринин сапатын көзөмөлдөөнү күчөтүүгө, объектилерди өз мөөнөтүндө бүткөрүүгө жана бөлүнгөн каражаттарды максаттуу пайдаланууга багытталганын белгиледи. Ошондой эле Манас шаарындагы башка курулуш иштеринин жүрүшү белгиленген тартипте улантыларын кошумчалады.
