Бишкек, 30.10.25. /Кабар/. Бүгүн Манас шаарынын "Манас сууканал" башкармалыгынын №2 саркынды сууларды тазалоочу жайында жаңыдан курулган курулмалар, реконструкциялоодон өткөрүлгөн имараттары пайдаланууга берилди. Бул тууралуу муниципалитеттен билдиришти.
Ага министрлер кабинетинин төрагасынын орун басары - УКМК төрагасы Камчыбек Ташиев, Манас шаарынын мэри Эрнисбек Ормоков, шаардык кеңештин төрагасы Нуртилек Болотов жана “ Манас Сууканал” башкармалыгынын эмгек жамааты катышты.
Саркынды сууларды тазалоочу жай Европа өнүктүрүү жана реконструкциялоо банкы тарабынан каржыланып, жалпы 5 млн. 489 430 евро акча каражат сарпталды. Ага административдик-чарбалык имарат толугу менен реконструкциялоодон өткөрүлүп, механикалык тазалоочу, биологиялык тазалоочу жай, эки даана экинчи тик тазалоочу курулмулар курулду.
Ошондой эле воздуховод-гидролиздик жабдуу менен жабдылып, башкы насостук станция курулду.
Белгилей кетсек, буга чейин Манас шаарындагы №2 саркынды сууларды тазалоочу жайы суткасына 8 миң метр кубга чейин саркынды сууларды кабыл алып келген болсо, жаңы курулганы суткасына 20 миң метр куб саркынды сууларды кабыл алууга ылайыкташкан.
