Бишкек, 25.11.25 /Кабар/. Бүгүн Манас шаарынын мэриясында "Манас" улуттук академиясынын "Кан Манастын кырк чоро" китебинин бет ачары өттү. Бул тууралуу муниципалитеттен билдиришти.
Иш-чарага мэр Эрнисбек Ормоков, шаардык кеңештин төрагасы Нуртилек Болотов, "Манас" улуттук академиясынын президентинин милдетин аткаруучу Назира Аалы кызы баштаган академиянын өкүлдөрү, шаардагы мекеме-ишканалардын кызматкерлери, окуу жайлардын студенттери катышты.
"Бул китеп – жөн гана чыгармалар жыйнагы эмес, бул дүйнөнү аралап өткөн Манас даңкынын, кыргыз элин биримдикке чакырган мурастын, унутулгус баатырдык салттын дагы бир терең изилдениши десек туура болот", -деген мэр китепти даярдаган "Манас" улуттук академиясынын эмгек жамаатына ыразычылык билдирди.
Ал эми аталган академиянын президентинин милдетин аткаруучу Назира Аалы кызы шаар мэри Эрнисбек Ормоковго төш белги жана китеп тапшырып, өз ара кызматташтык алдыда улана тургандыгын билдирди.
