Бишкек, 09.05.26. /Кабар/. Бүгүн Манас шаарында 9-Май – Улуу Жеңиштин 81 жылдыгына арналган салтанаттуу иш-чара өткөрүлдү. Бул тууралуу өкүлчүлүктөн билдиришти.
Маалыматта белгиленгендей, иш-чара алгач “Өлбөс полк” жөө жүрүшү менен башталды. Ага үч миңден ашуун жаран катышты.
Ошондой эле облустагы Советтер Союзунун Баатыры Тукубай Тайгараевдин эстелигине гүлчамбар коюлду.
Салтанатта облус башчысы Тилек Текебаев Улуу Жеңиштин тарыхый маанисине токтолуп, ата-бабалардын мекен үчүн көрсөткөн эрдиги, кайратмандыгы жана тынчтык үчүн жасаган каармандыгы эч качан унутулбасын белгилеп, алардын өрнөктүү жолу келечек муундар үчүн чоң сабак жана сыймык экенин айтты.
Иш-чаранын алкагында облус жетекчиси концлагердин туткуну Валентина Симоненкого президент Садыр Жапаровдун куттуктоосун жеткирип, белектерин тапшырды.
Бүгүнкү күндө Жалал-Абад облусунда бир гана согуш ардагери Базар-Коргон районунун 101 жаштагы тургуну Мурза Далиев жашайт. Ошондой эле Манас шаарында концлагердин туткуну Валентина Симоненко, ошондой эле Аксы районунда 1, Базар-Коргон районунда 3 жана Ноокен районунда 1 ооруктун ардагери бар.
Белгилей кетсек, Улуу Ата Мекендик согушка Жалал-Абад облусунан 34 миң 174 жоокер аттанып, алардын 12 миң 557си курман болгон. Ал эми 10 миң 257 жоокер дайынсыз жоголгон.
