Бишкек, 28.07.26 /Кабар/. Жогорку Кеңештин төрагасы Марлен Маматалиев Каракол шаарындагы бир катар социалдык, билим берүү жана эс алуу объектилеринин абалы менен жеринде таанышты.
Парламенттен билдиришкендей, алгач төрага Каракол шаарындагы жаңы уюштурулган пляж аймагын көрүп чыгып, жүргүзүлүп жаткан көрктөндүрүү жана инфраструктуралык иштер менен таанышты.
Андан соң Марлен Маматалиев Каракол шаарындагы №7 жалпы билим берүү мектебине барып, билим берүү мекемесинин учурдагы абалы, жүргүзүлүп жаткан оңдоо иштери жана келечектеги өнүктүрүү пландары менен таанышты.
Иш сапарынын алкагында төрага 1989-жылы салынган №4 жана №5 мектепке чейинки билим берүү уюмдарын да кыдырып, жүргүзүлүп жаткан оңдоп-түзөө иштеринин жыйынтыктары жана бала бакчаларды мындан ары жакшыртуу боюнча пландар менен таанышты.
Марлен Маматалиев мектепке чейинки билим берүү мекемелеринде балдардын коопсуздугун камсыз кылуу жана заманбап шарттарды түзүү мамлекеттик саясаттын артыкчылыктуу багыттарынын бири экенин белгилеп, иштин сапатына өзгөчө көңүл бурууга чакырды.
Андан соң ал Каракол шаарындагы "Восход" эс алуу аймагында болуп, анын инфраструктурасы жана эс алуучулар үчүн түзүлгөн шарттарды көрүп чыкты. Ошондой эле объектти мындан ары өнүктүрүү боюнча ишке ашырылып жаткан долбоорлор тууралуу маалымат угулду.
Иш сапар Каракол шаардык паркын көрүү менен жыйынтыкталды.
Мындан сырткары, Марлен Маматалиев Каракол шаарынын тургундары менен жолугуп, алардын сунуш-пикирлерин жана көйгөйлөрүн укту.
