Бишкек, 28.09.26. /Кабар/. Жогорку Кеңештин төрагасы Марлен Маматалиев Кара-Кулжа районуна болгон иш сапарында бир катар социалдык жана инфраструктуралык объектилердин абалы менен таанышты.
Парламенттен билдиришкендей, төрага Мырза-Аке – Кара-Кулжа – Алайку жолунун 34,6-чакырымындагы Кызыл-Суу суусуна курулган көпүрөнүн абалын көрдү. Аталган көпүрө 17 айылды район борбору менен байланыштырган жалгыз жол болуп саналат. Жаан-чачын маалында суу деңгээли көтөрүлүп, көпүрөгө коркунуч жаралгандыктан, жаңы көпүрө куруу долбоору 2026-жылдын титулдук тизмесине киргизилген.
Ошондой эле Ак-Талаа, Орто-Талаа жана Токбай-Талаа участкаларын сугат суу менен камсыздоо долбоорлору каралды. Анын алкагында 153 гектар, ошондой эле кошумча 215 гектар жерди сугат суу менен камсыздоо пландалууда.
Мындан тышкары, төрага Көндүк айылындагы 164 окуучу билим алган мектептин абалы менен таанышты. 1984-жылы курулган имарат 2014-жылы авариялык деп табылган. Анын ордуна 150 орундуу жаңы мектеп куруу үчүн долбоордук документтер даярдалган.
Иш сапардын соңунда Марлен Маматалиев Ылай-Талаа – Гүлчө жолунун курулушунун жүрүшүн көрдү. Узундугу 50 чакырым болгон жолду реконструкциялоого 1 млрд сом бөлүнүп, учурда жер жумуштары жүргүзүлүүдө.
Төрага көпүрө, жол, сугат суу жана мектеп боюнча долбоорлорду ишке ашырууну тездетип, курулуш иштеринин сапатына көңүл буруу зарылдыгын белгиледи.
