Бишкек, 24.03.25. /Кабар/. Маданият, маалымат жана жаштар саясаты министрлигинин имараты - мурдагы Достук үйү жана Кыргызстандын Совет бийлиги тушунда курулган алгачкы коомдук курулуштардын бири болуп саналат.
1928-жылы архитектор А.П. Зенковдун долбоору боюнча тургузулган бул имарат ошол доордун архитектурасынын өзгөчөлүктөрүн даңазалаган маанилүү эстеликтердин бири болуп калды. Имарат "Н" тамгасынын формасындагы композицияга ээ болуп, коридордук пландаштыруу системасы менен салынган.
Түндүк фасады советтик символика түшүрүлгөн медальондор менен кооздолгон, ал эми экинчи кабаттын терезелери ийри жаалуу формасында жасалган.
Аталган имарат бай тарыхка ээ – ал башында Кыргыз АССРинин Борбордук аткаруу комитети менен Эл комиссарлар кеңешинин жыйындары өтүүчү жай катары пайдаланылган. Кийинчерээк анын дубалдарында ар кандай мамлекеттик мекемелер жана музейлер жайгашкан.
Архитектуралык стили авангард жана постконструктивизм элементтерин классикалык декоративдик деталдар менен айкалыштырат. Ички жасалгасы улуттук оймо-чийме менен кооздолуп, Кыргызстандын маданий мурасын чагылдырат. 1937-жылы архитектор П. Иванов имараттын капталдарына колонналары бар порталдарды кошкон, ал эми 1946-жылы В. Верюжский анын үстүңкү бөлүгүн гербдик элементтер менен жаңыртып жасалгалаган.
Тарыхый жана архитектуралык эстелик катары республиканын маанилүү маданий объектилеринин бири болуп саналган бул имарат бүгүн да маданий турмуштун маанилүү борбору бойдон калууда. 2024-жылы анын фасадын жаңылоо, коргоо тосмолорун орнотуу жана инженердик системаларды модернизациялоо иштери болгон. Бул аракеттер тарыхый мурастын сакталышын камсыз кылуу менен бирге, аны азыркы талаптарга ылайыкташтырууга багытталган.
Аталган имарат архитектуралык эстелик гана болбостон, Кыргызстандын тарыхый өзгөрүүлөрүнүн катары да калууда. Ал өткөнгө болгон урмат-сый менен келечекке умтулуучу символ катары өз маани-маңызын сактап келүүдө.
