Бишкек 05.08.25 /Кабар/. Маданият, маалымат жана жаштар саясаты министри Мирбек Мамбеталиев Түркмөнстанда Жаштар форумуна катышты.
Маданият министрлигинен билдиришкендей, форум Түркмөнстандын Аваза туристтик аймагында өткөн деңизге чыгуу мүмкүнчүлүгү жок өнүгүп келе жаткан өлкөлөрдүн (РСНВМ) Үчүнчү конференциясынын алкагында орун алды.
Өз сөзүндө маданият министри Мирбек Мамбеталиев климаттын өзгөрүшүнүн күчөп бара жаткан кесепеттери жана деңизге чыга албаган өнүгүп келе жаткан өлкөлөр туш болгон ар түрдүү чакырыктар шартында жаштар жаңыча, тайманбас жана креативдүү чечимдерди сунуштай ала турган өзгөчө потенциалга ээ экенин баса белгиледи. Ал жаштар туруктуу өнүгүүнүн жана оң өзгөрүүлөрдүн негизги кыймылдаткычы экенин айтты.
Жаштар форуму БУУга мүчө мамлекеттердин өкүлдөрү, БУУнун түзүмдөрү жана башка кызыкдар тараптар менен жаш лидерлердин ортосунда ачык жана мазмундуу диалог жүргүзүү үчүн маанилүү аянтча болуп берди. Талкуулардын жүрүшүндө катышуучулар жаштарды чечим кабыл алуу процессине жана эл аралык күн тартибин ишке ашырууга тартуу жолдорун талкуулашып, тажрыйба жана ойлор менен бөлүшүштү.
Форумдун жыйынтыгында «РСНВМ келечегине көпүрө куруп» аттуу Жаштар декларациясы кабыл алынып, анда жаштардын деңизге чыга албаган өлкөлөрдүн туруктуу өнүгүүсүнө салым кошуу жана дүйнөлүк өзгөрүүлөрдүн активдүү катышуучусу болуу ниети чагылдырылды.
