Бишкек, 18.09.25. /Кабар/. Кыргызстанда "Таза аба" аттуу бир айлык экологиялык акция башталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, акция 16-сентябрь - дүйнө жүзү боюнча Озон катмарын коргоонун эл аралык күнүнө карата өтүүдө. Бул күн БУУнун башкы ассамблеясы тарабынан озон катмарын бузган заттар боюнча Монреал протоколунун кабыл алынган күнүн эскерүү максатында негизделген. Аталган күн озон катмарын коргоонун маанилүүлүгү тууралуу коомчулуктун маалымдуулугун жогорулатууга жана бул багытта мамлекеттердин эл аралык милдеттенмелерди аткаруу боюнча күч-аракеттерин бириктирүүгө багытталган.
Акция атмосфералык абанын сапатына көңүл буруу жана жарандарды озон катмарын, ошондой эле айлана-чөйрөнү коргоо иш-аракеттерине тартуу максатында өткөрүлүүдө. Анын алкагында муздаткыч заттарды жана аларды камтыган жабдууларды импорттоо менен алектенген бизнес өкүлдөрү менен жыйын өткөрүлдү.
Жолугушууда Кыргызстандын Монреал протоколу жана ага киргизилген өзгөртүүлөр боюнча алган милдеттенмелерин аткаруу маселелери каралып, озон катмарын бузган заттар менен алардын ордун басуучулардын импорту жана жүгүртүлүшүн жөнгө салуунун актуалдуу жагдайлары талкууланды.
Министрлик Кыргызстандын эл аралык милдеттенмелерди натыйжалуу аткаруу жана атмосфералык абаны, озон катмарын ишенимдүү коргоо үчүн бизнес коомчулугу менен конструктивдүү өз ара аракеттешүүнүн маанисин белгиледи.
