Бишкек, 22.08.25. /Кабар/. Финансы министрлиги ишкерлерге 9,3 млрд сомдон ашуун суммада пайызсыз насыяларды берди.
Ведомстводон маалымдашкандай, насыя "Микро, чакан жана орто ишканаларды шашылыш колдоо" долбоорунун алкагында берилди.
Өлкөдө 2021-жылдын 31-мартында Дүйнөлүк банк жана Азия инфраструктуралык инвестициялык банкы тарабынан каржыланган "Кыргыз Республикасынын жеке жана финансы секторун шашылыш колдоо" долбоору ишке киришкен.
2022-жылдын сентябрь айынан баштап ишкерлер пайысыз насыя ала башташкан. Ошондон бери насыяны 11 миң 765 ишкер алган. Анын ичинде:
- 1-категория боюнча (1 млн сомго чейин) 9 миң 594 ишкерге 5 млрд 700 млн 582 миң 424 сом берилген;
- 2-категория боюнча (3 млн сомго чейин) 2 миң 171 ишкер насыя алган.
Жалпы сумма 3 млрд 665 млн 323 миң 100 сомду түзгөн. Долбоор өлкөнүн бардык аймагында 2027-жылдын июлуна чейин ишке ашырылат.
Маалымат үчүн: Долбоорго катышуу үчүн зарыл болгон критерийлер:
1-Категория - КР салык мыйзамдарына ылайык иштеген, жылдык жүгүртүүсү 8 млн сомдон ашпаган жана 6 айдан кем эмес иштеген жеке ишкерлер.
2-Категория - КР салык мыйзамдарына ылайык иш жүргүзгөн, жылдык жүгүртүүсү 30 млн сомдон ашпаган жана 6 айдан кем эмес иштеген жеке ишкерлер жана юридикалык жактар.
Долбоордун алкагында айыл чарбасы каржыланбайт, насыя кыргыз сому менен пайызсыз берилет:
- финансылык жардамды пайдалануу мөөнөтү: 36 айга чейин;
- жеңилдетилген мезгилди берүү мүмкүнчүлүгү: 3 айга чейин.
Каржылык жардамдын суммасы:
- 1-категория үчүн – 1 млн сомго чейин;
- 2-категория үчүн - 3 млн сомго чейин.
Керектүү документтердин тизмеси өнөктөш банктар менен такталышы мүмкүн.
