Бишкек, 06.08.25. /Кабар/. "Кыргызстан аэропорттору" ААК менен БУУ-Аялдар түзүмү биргеликте стратегиялык өнөктөштүк жөнүндө меморандумга кол коюшту. Бул тууралуу компаниядан билдиришти.
Документ "Кыргызстан аэропорттору" ААКтын теңчилик, инклюзия жана туруктуу өнүгүү принциптерин жактагандыгын ырастап, компаниянын терең баалуулуктарын жана коомдо позитивдүү өзгөрүүлөрдү түзүүгө умтулгандыгын чагылдырып турат.
Аялдар – өнүгүүнүн кыймылдаткыч күчү жана алардын экономикага, башкарууга, чыгармачылык менен инновацияга кошуп жаткан салымдары баа жеткис.
"Меморандумдун алкагында БУУ-Аялдар уюму менен өнөктөштүктө аялдардын укуктарын жана мүмкүнчүлүктөрүн кеңейтүүгө, уюмдун ичинде гендердик теңдикти жогорулатууга, ошондой эле авиация тармагында аялдардын лидерлигин колдоого багытталган биргелешкен демилгелерди ишке ашыруу каралган", - деп айтылат маалыматта.
