Бишкек, 21.08.25. /Кабар/. Лейлекте чек арадан көчүрүлүп чыккандар үчүн 76 турак үйдүн курулушу кызуу жүрүүдө. Бул тууралуу президенттин Баткен облусундагы өкүлчүлүгүнөн билдиришти.
Бүгүн облус башчысы Айбек Шаменов турак үйлөрдүн курулушунан кабар алды.
Учурда Кулунду айыл аймагынын Раззаков айылында 60 үй, Максат айылында 16 үй курулууда. Мында 200гө жумушчу иштеп жатат.
Облус башчысы Айбек Шаменов, жергиликтүү жетекчилер менен куруучуларга алдыда күз-кыш мезгили келе жаткандыктан курулушту убагында бүткөрүү зарылдыгын белгилеп, сапатына өзгөчө маани берүүнү эскертти.
Белгилей кетсек, кыргыз-тажик мамлекеттик чек арасын делимитациялоонун жыйынтыгында Баткен облусунун айрым аймактарын Тажикстан менен алмашуунун натыйжасында жергиликтүү тургундарды көчүрүү үчүн жаңы турак үйлөрдүн курулушу башталган.
Лейлек районунун аймагындагы айрым алмашылган аймактардын жашоочулары үчүн жалпы 76 турак жай курулуп жатат. Бул үйлөргө Лейлек районунун Максат, Сада, Раззаков, Селкен айылдарынын жашоочулары жайгаштырылат.
Жалпы Лейлек жана Баткен району боюнча облуста 257 үй курулууда.
