Бишкек, 24.07.25. /Кабар/. Бүгүн Ички иштер министрлигинин Күзөт кызматынын ведомстволук милиция полкунун жаңы административдик имараты ачылды.
Ведомстводон маалымдашкандай, ачылыш аземине министр Улан Ниязбеков катышты.
Ал өздүк курамга кайрылып, кызмат үчүн заманбап шарттарды түзүү жана бөлүктөрдүн ишмердүүлүгүнө алдыңкы стандарттарды киргизүү министрликтин негизги милдеттеринин бири бойдон кала берээрин баса белгиледи.
"Бүгүн Күзөт кызматынын ведомстволук милиция полкунун өздүк курамына өзгөчө күн болуп турат. Биз замандын талабына ылайык курулган заманбап имаратты ачып, 16 жаңы кызматтык унааны бөлүмгө өткөрүп берип жатабыз. Материалдык-техникалык базаны жаңылоо иштин сапаттуу жаңы деңгээлин камсыздайт деп ишенем. Биздин милдетибиз -элге кызмат кылуу, тартипти жана коопсуздукту камсыз кылуу", - деди ал.
Жаңы имарат 1959-жылы түптөлгөн эски имараттын ордуна курулду. Аянты 700 чарчы метр болгон заманбап эки кабаттуу объект 10 айдын ичинде курулду. Ал ыкчам административдик жана кызматтык ишмердүүлүктүн талаптарына толук жооп берет. Имаратта кызматкерлердин ишин көзөмөлдөөнү жана корголуучу, анын ичинде өзгөчө маанилүү объекттердин коопсуздугун камсыз кылган "Санарип күзөт" тутуму киргизилген.
ИИМден белгилешкендей, 31-августта өлкөнүн Эгемендүүлүк күнүн майрамдоого карата дагы 40 жаңы объектини пайдаланууга берүү мерчемделүүдө. Алдыда министрлик эң жогорку талаптарына жооп берген 100 заманбап имарат куруу максатын көздөп жатат.
