Бишкек, 16.09.25. /Кабар/. "Кызмат" мекемеси ЕККУ өкүлдөрүнө санариптик долбоорлорун тааныштырды. Бул тууралуу "Кызмат" мамлекеттик мекемесинен билдиришти.
Маалыматка ылайык, мекеменин IT-блогунда ЕККУнун атайын өкүлү, төрагалык кылуучунун атайын элчиси Тери Хакала, ЕККУнун Бишкектеги Программалык кеңсесинин башчысы, элчи Фолькер Фробарт, Санариптик өнүктүрүү жана инновациялык технологиялар министри Азамат Жамангулов жана башка мамлекеттик мекемелердин жетекчилери катышкан жолугушуу болуп өттү.
Иш-чаранын жүрүшүндө катышуучулар мамлекеттик онлайн-сервистерди өнүктүрүүгө жана инновациялык чечимдерди киргизүүгө багытталган негизги санариптик долбоорлор көрсөтүлдү.
Тараптар мамлекеттик кызмат көрсөтүүлөрдүн сапатын жана жеткиликтүүлүгүн жогорулатуу үчүн санариптештирүү жана заманбап технологияларды илгерилетүү тармагында мындан ары да кызматташууну улантууга даяр экенин белгилешти.
