Бишкек, 16.04.25. /Кабар/. Кытайлык компания Кыргызстанда мопед жана электромотоциклдерди чыгаруучу завод ачууга кызыкдар. Бул туралуу КР Соода-өнөр жай палатасынан билдиришти.
Маалыматка ылайык, аталган маселе Соода-өнөр жай палатасынын президенти Темир Сариевдин Кытайдын Цзянсу провинциясынын Сюйчжоу шаарында жайгашкан Huaihai Holding Group компаниясынын өкүлдөрү менен жолугушуусунда айтылды.
Жолугушуунун жүрүшүндө инвестициялык кызматташтык маселелери талкууланып, компаниянын жетекчилиги Кыргызстанда мопеддерди жана электромотоциклдерди чыгаруучу завод ачууга кызыкдар экенин билдирди.
Маалымат үчүн: Huaihai Holding Group — Кытайдагы эң ири жеңил транспорт каражаттарын чыгаруучу компаниялардын бири болуп саналат. Компания дүйнөлүк рынокто 40 жылдан ашуун убакыттан бери иш алып барып келет. Бул долбоорду Кыргызстанда ишке ашыруу өлкөнүн өнөр жай мүмкүнчүлүгүн өнүктүрүүгө, жаңы жумуш орундарын түзүүгө жана заманбап технологияларды киргизүүгө өбөлгө түзөт.
