Бишкек, 21.09.26. /Кабар/. Кыргызстандын Соода-өнөр жай палатасы Кытайдын Шанхай шаарында өзүнүн өкүлчүлүгүн ачты. Анын ачылыш аземине палатанын президенти Темир Сариев катышты.
Мекеменин маалыматына караганда, Шанхай Кытайдын ири финансылык, технологиялык, өнөр жай жана логистикалык борборлорунун бири болуп саналат. Өкүлчүлүктүн ачылышы Кыргызстан менен Кытайдын ортосунда соода-экономикалык байланыштарды кеңейтүүгө жана биргелешкен өндүрүштөрдү түзүүгө багытталган.
Буга чейин Темир Сариев Кытай менен 100 кыргыз-кытай биргелешкен ишканасын түзүү демилгесин көтөргөн. Шанхайдагы өкүлчүлүктүн ачылышы бул демилгени ишке ашыруунун практикалык кадамдарынын бири болуп саналат.
"Биздин максатыбыз жөн гана Кытай менен сооданы көбөйтүү эмес. Биз Кытайдын технологиясын, инвестициясын жана өндүрүш тажрыйбасын Кыргызстанга алып келүүнү каалайбыз", – деди Темир Сариев.
Анын айтымында, бул биргелешкен ишканаларды, жумуш орундарын жана жогорку кошумча нарктагы продукцияларды түзүүгө өбөлгө болот.
