Бишкек, 03.07.25. /Кабар/. Кытай – Кыргызстан – Өзбекстан темир жолунун курулушуна байланышкан маселелер ыкчам чечилүүдө. Бул тууралуу президенттин Жалал-Абад облусундагы өкүлчүлүгүнөн билдиришти.
Маалыматка караганда, күн мурун президенттин аймактагы өкүлүнүн биринчи орун басары Нурлан Эрматов, жергиликтүү бийлик, кытайлык компаниянын өкүлдөрү жана тийиштүү мекеме-ишканалардын кызматкерлери менен темир жолдун курулушунун жүрүшү менен таанышты.
Алар курулуш процесси жүрүп жаткан Сузак районунун Көк-Арт айыл аймагынан Тогуз-Торо районуна карай жайгашкан Сары-Кыр ашуусуна чейинки аралыкка барып, темир жол курууга керектелүүчү атайын база, тоннель казуу жайлары, арматуралык курулуштар жана өндүрүштүк заводдордогу жумуштардын жүрүшүн көрүштү.
Нурлан Эрматов курулуш иштеринде коопсуздук жана бардык нормаларды так сактоо, айлана-чөйрөгө тийгизе турган таасирин эске алуу менен экологиялык талаптардын сакталышы зарыл экенин баса белгиледи.
Ошондой эле темир жол курулушунда жаралган көйгөйлөрдү жеринде ыкчам чечилерин айтып, бул демилге стратегиялык мааниге ээ Кытай – Кыргызстан – Өзбекстан темир жол долбоорунун үзгүлтүксүз жана натыйжалуу ишке ашуусуна өбөлгө түзөөрүн кошумчалады.
