Бишкек, 17.08.26. /Кабар/. Кыргызстанга биринчи партия катары болжол менен 10 миң тонна карбамид жеткирүү пландалууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, жер семирткич жеткирүү боюнча тиешелүү келишим "Кыргыз агрохолдинг" ААК менен Кытайдын Beijing Huafu Engineering Co., Ltd. компаниясынын ортосунда түзүлдү.
Макулдашуу ата мекендик дыйкандарды сапаттуу минералдык жер семирткичтер менен өз убагында камсыздоого багытталган. Кызматташуу жазгы-талаа жана күзгү иштер маалында жер семирткичтердин тартыштыгын азайтууга шарт түзөт.
Белгиленгендей, карбамиддин жеткиликтүү болушу айыл чарба өсүмдүктөрүнүн түшүмдүүлүгүн жогорулатууга жана агрардык тармактын туруктуу өнүгүшүнө өбөлгө болот.
