Бишкек, 22.07.26. /Кабар/. Өзбекстандын Ташкент шаарында "Экспорттук акселерация" программасынын алкагында кыргызстандык текстиль жана тигүү тармагынын өндүрүүчүлөрүнүн үч күндүк бизнес-миссиясы башталды.
Экономика жана коммерция министрлигинен билдиришкендей, иш-чараны Кыргызстандын Өзбекстандагы Соода өкүлчүлүгү, "Кыргыз экспорт" мамлекеттик мекемеси жана Текстилди өнүктүрүү борбору уюштурду.
Бизнес-миссияга өлкөнүн 35тен ашык текстиль жана тигүү ишканасынан 52 өкүл катышууда. Анын негизги максаты – кыргыз өндүрүүчүлөрүнүн Өзбекстан рыногуна чыгышына көмөктөшүү жана эки өлкөнүн соода-экономикалык кызматташтыгын чыңдоо.
Программанын алкагында делегация TFT Expo 2026 эл аралык көргөзмөсүнө катышып, жаңы өнөктөштөр менен сүйлөшүүлөрдү өткөрдү. Ошондой эле ишкерлер Uzum Market компаниясынын логистикалык борборуна барып, кыргыз продукциясын маркетплейс аркылуу сатуу мүмкүнчүлүктөрүн талкуулашты.
Мындан тышкары, төрт кыргызстандык ишкерге Өзбекстанда юридикалык жактарды каттоого көмөк көрсөтүлүп, бул алардын өлкөдө ишмердүүлүгүн жүргүзүп, продукциясын онлайн сатууга жол ачты. Делегациянын өкүлдөрү ошондой эле Өзбекстандын ири текстиль ишканаларынын ишмердүүлүгү менен таанышмакчы.
