Бишкек, 07.07.26. /Кабар/. Кытайдын Шанхай шаарында "Кытай – ШКУ" аймактык сотторунун судьяларынын эл аралык форуму өттү.
Жогорку соттон билдиришкендей, форумга Кытай, Россия, Казакстан, Өзбекстан жана башка өлкөлөрдөн 100дөн ашык делегат, анын ичинде Кыргызстандын Жогорку сотунун судьялары катышты.
Бул иш-чара ШКУнун түзүлгөндүгүнүн 25 жылдыгына жана жогорку сот төрагаларынын кеңешме механизминин 20 жылдыгына туш келди.
Форумда сот өндүрүшүндө жасалма интеллект технологияларын колдонуу, чек ара аркылуу жүргүзүлүүчү сооданы соттук кепилдиктер менен камсыз кылуу жана бизнес үчүн укуктук чөйрөнү жакшыртуу жана судьяларды даярдоо, квалификациясын жогорулатуу жана тажрыйба алмашуу сыяктуу маселелер көтөрүлдү.
Иш-чаранын практикалык бөлүгүндө Кыргызстандын делегациясы Шанхайдын Жогорку жана Биринчи орто инстанциядагы элдик сотторунун ишмердүүлүгү менен таанышты. Анда кыргызстандык судьялар Кытайдын сот адилеттигин жүзөгө ашыруу процессин жана сот тутумун санариптик трансформациялоо боюнча алдыңкы тажрыйбасын жеринен үйрөнүштү.
