Бишкек, 19.05.25. /Кабар/. Кыргызстандык режиссердун "Жайлоого карай узак жол" тасмасы Германиянын Оберхаузен шаарында өткөн абройлуу эл аралык кинофестивалдын Гран-присин жеңип алып, Оскардын тандоосуна катышууга мүмкүнчүлүк алды.
Мындан 60 жыл мурун залкар режиссер Болот Шамшиев "Манасчы" даректүү тасмасы менен Германиядагы беделдүү Оберхаузен эл аралык кинофестивалын жеңип алган. 1965-жылдан бери аталган сынактан баш байге алган кыргызстандык болгон эмес.
Быйыл Оберхаузен фестивалына режиссер Илгиз-Шернияз Турсунбек уулу катышып, анын "Жайлоого карай узак жол" даректүү тасмасы гран-прини утуп алды.
Белгилей кетсек, бул жылкы сынакта жалпы 6 600 кинонун ичинен 42 мамлекеттин 124 тасмасы тандалып алынган. Орто Азиядан бир гана кыргызстандык фильм конкурска өткөн.
Бул эгемендик жылдарындагы А класстагы фестивалдын баш байгесин утуп алган алгачкы кыска метраждуу тасма болуп саналып, Оберхаузен фестивалын жеңгендердин тасмасы Оскар сынагында ат салышууга мүмкүнчүлүк алмакчы.
Илгиз-Шернияз гран-приден тышкары Германиянын Түндүк Рейн-Вестфалия аймагынын Маданият жана илим министрлигинин экинчи премиясын алган.
Тасмада баш каарман Азиз үй-бүлөсүн багуу үчүн айыл элинин малын алып жайлоого чыгат. Жайлоого жетүү үчүн ар кандай кыйынчылыктарды көрүп, турмуш-тиричилик үчүн чыныгы күрөш жүрөт. Адам, жаныбар, табият бири-бирине ылайыкташууга туура келет.
"Deutsche Welle" басылмасы калыстар тобу тасма абдан жандуу тартылганын, өздөрү кошо жайлоого бараткандай таасир алганын айтып, эмгекке жогорку баасын беришкен. Адистер оператордук ишти өзгөчө баалап, "кинонун тили менен тартылган мыкты фильм" деп аташкан.
