Бишкек, 22.10.25 /Кабар/. 21-23-октябрда Бириккен Араб Эмираттарынын борбору Абу-Даби шаарында Abu Dhabi International Food Exhibition (ADIFE 2025) эл аралык көргөзмөсү өтүүдө.
"Кыргыз экспорт" экспортту өнүктүрүү жана илгерилетүү борборунан билдиришкендей, иш-чара Global Food Week жумалыгынын алкагындагы маанилүү окуялардын бири болуп саналат.
Кыргызстандын катышуусу Экономика жана коммерция министрлигине караштуу "Кыргыз экспорт" борборунун демилгеси жана Кыргызстандын БАЭдеги элчилигинин колдоосу менен уюштурулду.
Эл аралык көргөзмөгө Кыргызстандан 12 ата мекендик компания катышууда. Алар көргөзмөдө кондитердик азыктарды, ичүүчү жана минералдык суусундуктарды, кулпунайды, кургатылган өрүктү, жаңгакты, мистени, органикалык майларды, ошондой эле буурчак жана фасоль сыяктуу айыл чарба продукцияларын сунуштап жатышат.
Кыргызстандын улуттук павильону жогорку деңгээлде даярдалып, Made in Kyrgyzstan брендин эл аралык рынокто илгерилетүүгө жана ата мекендик өндүрүүчүлөрдүн экспорттук мүмкүнчүлүктөрүн кеңейтүүгө багытталган.
