Бишкек, 25.08.26. /Кабар/. Кыргызстандын Куралдуу күчтөрүнүн командасы Екатеринбург шаарында атайын багыттагы бөлүктөрдүн арасында өтүп жаткан "Вызов" эл аралык мелдешине катышууда.
Коргоо министрлигинен билдиришкендей, мелдеш 24-августта "Свердловск" полигонунда башталган. Ага Россия, Кыргызстан, Казакстан жана Индиядан 40ка жакын команда катышууда.
Мелдештин жүрүшүндө аскер кызматкерлери кесиптик даярдыгын, физикалык чыдамкайлыгын жана татаал шарттарда ыкчам жана натыйжалуу аракеттенүү жөндөмүн көрсөтүшөт.
Программада барымтадагыларды бошотуу жана кармоо, тоскоолдуктар тилкесинен өтүү, эвакуациялоо, буктурма, чабуул, дуэль жана мунара сыяктуу практикалык көнүгүүлөр каралган.
