Бишкек, 22.05.25. /Кабар/. Кыргызстандык Вероника Бернацская жана Рамина Цой Азия футбол конфедерациясынын чемпиондор лигасында калыстык кылышты. Бул тууралуу Кыргыз футбол биримдигинен билдиришти.
Маалыматка ылайык, ушул күндөрү Кытайда кыз-келиндер арасында АФКнын чемпиондор лигасынын финалдык баскычы өтүп жатат. Бул престиждүү турнирге төрт өлкөнүн алдыңкы кыз-келиндер клубдук командалары катышууда.
Алар континенттин эң мыкты наамын алуу үчүн күч сынашууда.
Турнирдин биринчи жарым финалдык беттеши өзгөчө учур менен белгиленди — оюнду тейлөөгө Кыргызстандын калыстары чакырылды. ФИФА категориясындагы эл аралык калыс Бернацкая Вероника башкы калыс болуп, ал эми анын жардамчысы катары ФИФА калысы Цой Рамина кызмат өтөштү.
"Бул окуя кыргыз калыстары үчүн чоң жетишкендик болуп эсептелет жана өлкөбүздүн эл аралык спорт аренасындагы аброюн дагы бир ирет бекемдеди",-деп айтылат маалыматта.
