Бишкек, 10.11.25. /Кабар/. Бүгүн Дене тарбия жана спорт мамлекеттик агенттигинин директору Казыбек Молдажиев Япониянын борбору Токио шаарында өтө турган XXV жайкы Сурдлимпиада оюндарына катыша турган спортсмендер менен жолукту.
Агенттиктен билдиришкендей, жолугушууда Казыбек Молдажиев спортсмендерге кайрылып, ар бир жеңиш - бул жеке эрдик, ал эми ар бир медаль - мекенге болгон сүйүүнүн белгиси экенин белгиледи. Сиздердин ар бир кадамыңыздар жаш спортсмендер үчүн үлгү, ар бир аракетиңиздер - жеңишке жакындаган жол, - деди.
Иш-чаранын жүрүшүндө спорт агенттигинин жетекчиси спортсмендерге ийгилик, чыдамкайлык каалап, Кыргызстандын курама командасынын капитаны Ажимукан Мидин уулуна мамлекеттик тууну тапшырды.
Белгилей кетсек, Токиодо өтө турган XXV жайкы Сурдлимпиада оюндарына Кыргызстандын атынан 19 спортсмен спорттун төрт түрү боюнча - эркин жана грек-рим күрөшү, таэквондо, дзюдо жана стол тенниси боюнча катышат.
Ири эл аралык мелдешке дүйнөнүн 70 өлкөсүнөн 3000ден ашык спортчу катышары күтүлүүдө. Мелдештер 15-26-ноябрь күндөрү өтөт
