Бишкек, 15.10.25 /Кабар/. Жыл башынан бери Кыргызстанда керектөө бааларынын өсүшү 5,5 пайызды түздү. Бул тууралуу Улуттук статистика комитетинин төрагасынын биринчи орун басары Назира Керималиева билдирди.
Анын маалыматы боюнча, республика боюнча 2025-жылдын январь-сентябрь айларында:
- тамак-аш азыктарынын жана алкоголсуз суусундуктардын баасы 6,4 пайызга жогорулады;
- алкоголдук ичимдиктерге жана тамеки буюмдарына баа 5,1 пайызга өстү;
- тзык-түлүк эмес товарларга баа 3,3 пайызга жогорулады;
- калкка көрсөтүлүүчү кызмат көрсөтүүлөрдүн тарифтери 6,3 пайызга өстү.
"Өткөн жылдын декабрына салыштырмалуу керектөө бааларынын жана тарифтердин жогорулашы өлкөнүн бардык аймактарында байкалды", — деп белгиледи Керималиева.
Баалардын эң жогорку өсүшү — 7,5 пайыз — Ош шаарында катталды, бул алкоголдук ичимдиктердин жана тамеки буюмдарынын 10,9 пайызга кымбатташына байланыштуу болду.
Ошондой эле тамак-аш азыктарына жана алкоголсуз суусундуктарга баалардын эң көп өсүшү Чүй облусунда (9,5%), азык-түлүк эмес товарларга Ысык-Көл облусунда (4,8%), ал эми кызмат көрсөтүүлөрдүн тарифтеринин жогорулашы Талас облусунда (9,3%) байкалды.
