Бишкек, 01.12.25. /Кабар/. КМШнын байкоочулар миссиясынын башчысы, КМШнын башкы катчысынын биринчи орун басары Игорь Петришенко бүгүн Борбордук шайлоо комиссиясында өткөн брифингде Жогорку Кеңештин депутаттарын мөөнөтүнөн мурда шайлоо ачык, атаандаштык шартында жана улуттук мыйзамдарга ылайык өткөнүн билдирди.
Анын айтымында, шайлоо өнөктүгү учурунда басма сөз жыйындары уюштурулуп, көптөгөн маектер болуп, миссиянын иши ар тараптуу жана маалымат каражаттарында чагылдырылды. Петришенко журналисттерге жарандарды ыкчам маалымдагандыгы үчүн ыраазычылык айтты.
Ал Кыргызстандын шайлоо мыйзамдары жалпыга таанылган эл аралык стандарттарга жооп берерин жана эркин жана демократиялык шайлоолор үчүн зарыл болгон укуктук негизди түзөрүн белгиледи.
"Өнөктүктү БШК, 30 райондук жана 2619 участкалык шайлоо комиссиялары, анын ичинде 27 аралыктан добуш берүү шайлоо тилкелери жана 100 чет өлкөдөгү шайлоо тилкелери уюштурду", - деди ал.
Ошондой эле миссия башчысы узак мөөнөттүү мониторингдин алкагында КМШнын байкоочулары өлкөнүн аймактарындагы шайлоо комиссияларына барышканын белгиледи.
Алардын баамында, комиссиялар жогорку кесипкөйлүктү көрсөтүштү жана шайлоо тилкелери тийиштүү түрдө жабдылган. Талапкерлерди көрсөтүү жана каттоо процедуралары да мыйзамга ылайык жүргүзүлдү, 90 парламенттик орун үчүн 460 талапкер ат салышты. Петришенконун пикиринде плюрализм жана атаандаштык камсыз кылынды.
“Өнөктүк жакшы уюштурулган жана мыйзам талаптарына ылайык өттү, ал эми мамлекеттик органдар жана маалымат каражаттары коомчулукту шайлоо процесси жөнүндө активдүү түрдө маалымдашты. Өлкөдө мүмкүн болгон мыйзам бузууларга тез арада жооп берилип, арыздарды өз убагында кароо үчүн шарттар түзүлдү.
30-ноябрда, добуш берүү күнү миссиянын өкүлдөрү бардык аймактардагы 600дөн ашык шайлоо тилкелерине барышты жана чет өлкөлөрдөгү добуш берүүгө да көз салышты. Шайлоо тилкелери өз убагында ачылып, добуш берүү мамлекеттик гимнди аткаруу менен башталып, тынч атмосферада өттү. Биринчи жолу бардык шайлоо тилкелерде видеобайкоо колдонулду, ал эми шайлоочулар алыстан добуш берүүнү, анын ичинде соода борборлорундагы жана базарлардагы жерлерде активдүү колдонушту”, - деп баса белгиледи ал.
Миссия башчысынын айтымында, добуштарды эсептөө конституциялык мыйзамга ылайык жүргүзүлдү жана аныкталган техникалык кемчиликтер комиссиялар тарабынан тез арада оңдолду. Байкоочулар шайлоонун жыйынтыктарына таасир тийгизе турган эч кандай мыйзам бузууларды катташкан жок.
Игорь Петришенко шайлоо ачык, адилеттүү жана демократиялык стандарттарга ылайык өткөнүн кошумчалады.
