Бишкек, 07.07.26. /Кабар/. Жогорку сотто талаш-тартыштарды соттон тышкары жөнгө салуу механизмдерин өнүктүрүүгө багытталган үч тараптуу меморандумга кол коюлду. Бул тууралуу ведомстводон билдиришти.
Маалыматка ылайык, документке Жогорку соттун төрагасынын орун басары Шералы Камчыбеков, Медиаторлор палатасынын төрайымы Гүлсина Кожоярова жана Сот адилеттигинин жогорку мектебинин директору Эркинбек Токтомамбетов кол коюшту.
Иш-чаранын алкагында тараптар медиация институтун жайылтуу жана элдештирүү жол-жоболорун кеңейтүү маселелерин талкуулашты. Жогорку соттун төрагасынын орун басары медиация тараптарга өз ара урматтоо негизинде убакытты жана финансылык чыгымдарды кыскартууга мүмкүнчүлүк бере турган натыйжалуу укуктук механизм экенин белгиледи.
Ошондой эле жолугушууда 2027-жылдын 1-январынан тартып күчүнө кире турган Жарандык процесстик кодексиндеги өзгөртүүлөргө өзгөчө көңүл бурулду. Жаңы мыйзамдык нормалар медиация институтун мындан ары өнүктүрүүгө багытталган.
Меморандумду ишке ашыруу талаш-тартыштарды тынчтык жолу менен чечүүнүн натыйжалуу системасын калыптандырууга жана сот адилеттигине болгон коомдук ишенимди арттырууга өбөлгө түзөрү айтылды.
