Бишкек, 22.10.26. /Кабар/. Кыргызстанда акыркы беш жылда балдардын онкологиялык ооруларын дарылоого мамлекеттик каржылоо үч эсеге көбөйдү. Бул тууралуу саламаттык сактоо министри Дамир Осмонов 21-октябрда Өзбекстандын Самарканд шаарында өткөн балдардын бакубаттуулугу боюнча дүйнөлүк саммитте билдирди.
Министрдин айтымында, өлкөдө балдардын рак ооруларынын улуттук реестри түзүлүп, Бишкек жана Ош шаарларында адистештирилген медициналык жардам өнүктүрүлүүдө. 2025-жылы Кыргызстанда биринчи жолу өспүрүмгө өзүнүн жилик чучугун трансплантациялоо операциясы жасалган.
Кыргызстан 2023-жылы Дүйнөлүк саламаттык сактоо уюмунун балдар арасындагы рак ооруларына каршы күрөшүү боюнча глобалдык демилгесине кошулган. Анын максаттарынын бири — 2030-жылга чейин онкологиялык ооруларга чалдыккан балдардын жашап кетүү көрсөткүчүн кеминде 60 пайызга жеткирүү.
Дамир Осмонов балдардын ооруларын эрте аныктоо, заманбап дарылоо ыкмаларын киргизүү жана керектүү дары-дармектердин жеткиликтүүлүгүн кеңейтүү маанилүү экенин белгиледи.
